On Orya Maqbool Jan (In Urdu)

(Appeared first on Dawn Urdu)

اوریا  کا  بوریا

برطانیہ  نے  نوے  سال  تک  براہ راست  برصغیر  پر  حکومت  قائم  رکھی۔  اس  تمام  عرصے  کے  دوران  حکومت  کا  کام  افسر  شاہی  کے  ذمے  تھا۔  سن  1857  سے  تقسیم  تک  برطانوی  افسروں  کی  تعداد  کبھی  ایک  ہزار  سے  تجاوز  نہیں  کی،  بلکہ  تقسیم  کے  وقت  متحدہ  ہندوستان  میں  کل  چھے  سو  چالیس  برطانوی  افسر  تعینات  تھے  اور  انہوں  نے  کروڑوں  کی  آبادی  اور  ایک  وسیع و عریض  علاقے  پر  برطانوی  راج  قائم  رکھا۔  ایک برطانوی  وزیر اعظم  نے  اس  افسر  شاہی  کو  برطانوی  راج  کا  آہنی  ڈھانچہ  قرار  دیا  تھا۔  وقت  کے  ساتھ  ساتھ  اس  سروس  میں  ہندوستانی  افراد  کو  بھی  جگہ  ملی  اور  انکی  تربیت  برطانوی  افسروں  جیسی  ہی  کی  جاتی۔  پاکستان  بننے  کے  بعد  اس  سروس  کے  لوگ  پاکستان  میں  پی  سی  ایس (پاکستان  سول  سروس)  کے  نام  سے  جانے  گئے۔ 

قیام  پاکستان  کے  بعد  سیاست  دانوں  کی  نااہلی  کے  باعث  افسر  شاہی  کو  حکومت  میں  حصہ  لینے  کا  موقع  ملا  اور  غلام  محمد،  چوہدری  محمد  علی  وغیرہ  نے  بہتی  گنگا  میں  ہاتھ  دھوئے۔  ان  کے  بعد  آنے  والوں  نے  براہ راست  حکومت  تو  نہیں  کی  البتہ  ایوب  خان  کے  قریبی  حلقے  میں  ضرور  شامل  رہے،  جیسے  قدرت اللہ شہاب  اور  الطاف  گوہر۔  ان  افراد  میں  سے  بہت  سوں  نے  مصنف  بننے  کی  کوشش  بھی  کی۔  اس  ضمن  میں  چوہدری  محمد  علی  نے  ایک  کتاب  لکھی  جو  پاکستانی  کی  ’نظریاتی‘  جہت  کی  جانب  پہلا  قدم  شمار  کی  جاتی  ہے۔   الطاف  گوہر  نے  بھی  اس  میدان  میں  مشق آزمائی  کی  اور  شہاب  صاحب  نے  بھی۔ان  کتابوں  میں  عام  طور  پر  اپنے  کارناموں  کی  تفصیل  بیان  کی  جاتی  ہے  اور  پاکستان  کی  جملہ  خامیوں  پر  اپنی  ماہرانہ  رائے  سے  نوازا  جاتا  ہے۔   

ہمارے  زمانہء ِ  طالب  علمی  کے  دوران  کسی  محفل  میں  جب  بھی  اردو  ادب  کی  بات  چھڑتی  تو  چند  مخصوص  کتابوں  اور  مصنفین  کا  تذکرہ  ضرور  ہوتا  تھا۔  ان  کتابوں  میں  شہاب  نامہ  سر  فہرست  تھی(آج  کل  ’بابا  صاحبا‘  کا  یہ  مقام  ہے)۔  ہمارے  ایک  استاد  کے  مطابق  ’شہاب نامہ  دراصل  بارہ  مسالوں  کی  چاٹ  کی  مثل  ہے۔اس  میں  قاری  کو  مزاح  بھی  ملتا  ہے،  تلقین بھی،  افسانہ  بھی،تصوف  بھی  اور  کچھ  کچھ  تاریخ  بھی۔‘  قدرت  اللہ شہاب  کا  شمار  ملک  کے  ان  مصنفین  میں  ہوتا  ہے  جو  ساری  عمر  افسر  شاہی  کا  حصہ  رہے۔  اپنے  عروج  کے  دور  میں  موصوف  ایوب  خان  کے  دست  راست  سمجھے  جاتے  تھے  اور  انہوں  نے  اردو  لکھاریوں  کی  ایک  گلڈ  تشکیل  دی،  جو  ادیبوں  کے  سالانہ  جلسے  حکومتی  خرچ  پر  منعقد  کرواتی  رہی۔  کہا  جاتا  ہے  کہ  اس  گلڈ  کی  بدولت  ایوب  خان  کی  حکومت  نے  اپنے  آپ  کو  تنقید  سے  محفوظ  کر  لیا  اور  اسی  بہانے  ادب  کی  درگاہ  پر  بھی  پھول  چڑھ  گئے۔شہاب  کے  دیگر  کارناموں  میں  پاکستان  ٹائمز  اور  دیگر  ترقی  پسند  اخبارات  کا  سرکاری  تحویل  میں  لیے  جانا  اور 1963 کا  جابرانہ  پریس  آرڈینینس  بھی  شامل  ہیں۔

  شہاب  صاحب  نے  ساری  عمر  سرکار  کی  نوکری  میں  گزاری  اور  اواخر  عمر  میں  صوفی  ہو  گئے۔ شہاب  صاحب  کے  سلسلے  کو  انکی  وفات  کے  بعد  کچھ  دیر  زوال  آیا  لیکن  عصر  حاضر  میں  اس  سلسلے  کے  ایک  نئے  گدی  نشین  کا  ظہور  دیکھنے  کو  ملا  ہے۔

جہادی  اخبار  ضرب  مومن  کے  لیے  باقاعدہ  لکھنے  کے  بعد  یہ  صاحب  کافی  عرصے  سے  دائیں  بازو  کے  ایک  اخبار  کے  صفحات  پر  براجمان  ہیں۔  کچھ  عرصہ  قبل  ہم  نے  انکا  ذکر  کیا  کہ  کس  طرح  وہ  حضرت  شعیب  کی  قوم  کے  زوال  کا  سبب  سرمایہ  دارانہ  جمہوریت  کو  ٹھہراتے  ہیں،  یا  زیارت  ریذیڈنسی  کے  نذر  آتش  ہونے  پر  انہوں  نے  دو  قومی  نظریے  کو  خدا  کی  جانب  سے  تقسیم  قرار  دیا۔  جی،  میرا  اشارہ  حضرت  اوریا  مقبول  جان  کی  جانب  ہے،  جنہیں  چند  شریر  دوست  یوریا  مقبول  کے  نام  سے  یاد  کرتے  ہیں۔ 

بین الاقوامی  اخبارات  اور  ٹی  وی  چینلوں  کا  یہ  وطیرہ  رہا  ہے  کہ  جو  افراد  کسی  مخصوص  شعبے  یا  مضمون  میں  مہارت  رکھتے  ہیں،  ان  سے  اسی  مضمون  یا  شعبے  پر  رائے  کے  اظہار  کے  لیے  کہا  جاتا  ہے۔  اگر  کوئی  معاشیات  کا  ماہر  ہے  تو  وہ  اخبار  میں  اسی  موضوع  پر  لکھے  گا  اور  اپنی  رائے  کا  اظہار  کرے  گا،  ایسا  ممکن  نہیں  کہ  وہ  طرز  معاشرت  یا  طب  کے  متعلق  بھی  کہانی  بننا  شروع  کر  دے۔  ہمارے  ملک  میں  فی الحال  ایسا  کوئی  رواج  نہیں  اور  اس  کے  باعث  ہمارے  کالم نویس  اور  ٹی وی  اینکر(اور  اکثر  مہمان)  ہر فن  مولا  سمجھے  جاتے  ہیں۔  فلسفے  سے  لے  کر  طب  اور  دودھ  کے  بڑھتے  نرخوں  تک،  ہر  مسئلے  پر  ان  خواتین و حضرات  کو  عبور  حاصل  ہے۔     

اوریا  صاحب  کی  زندگی  کی  کہانی  انہی  کی  زبانی  سن  لیجیے:

’میں  نے  سات  سال  کی  عمر  میں  شاعری  شروع  کی،  بارہ  سال  کی  عمر  میں  میری  پہلی  غزل  ایک  مؤقر  ادبی  جریدے  میں  چھپی،  سولہ  سال  کی  عمر  میں  پہلا  افسانہ  میں  نے  حلقہ  ارباب  ذوق  میں  پڑھا۔ سن  1988  میں  میرا  شعری  مجموعہ  ’قامت‘  شائع  ہوا۔  اس  کے  بعد  میں  نے  بیس  سال  ٹیلی ویژن  پر  ڈرامے  لکھے  جن  میں  پانچ  سیریل  اور  پچاس  سے  زیادہ  انفرادی  ڈرامے  شامل  ہیں۔ میری  بنیادی  تعلیم  نفسیاتی  امراض  کے  علاج  سے  متعلق  ہے۔  میں  یہ  مضمون  بلوچستان  یونیورسٹی  میں  پڑھاتا  رہا  ہوں۔لاہور  مینٹل  ہسپتال  میں  میں  نے  دو  سال  تربیت  حاصل  کی  ہے۔‘  یہ  ساری  تمہید  باندھنے  کے  بعد  اسی  مضمون  میں  اوریا  صاحب  نے  سعادت  حسن  منٹو  کی  قبر  پر  لاتیں  رسید  کی  ہیں  اور  انکو  جنسی  ہیجان  میں  مبتلا  قرار  دیا  ہے۔  ساتھ  ہی  ساتھ  یہ  بھی  ارشاد  فرما  دیا  کہ  معاشرے  میں  فحاشی  کی  لت  منٹو  کے  افسانوں  جیسے  دیگر  افسانوں  کی  بدولت  پھیلتی  ہے۔  اوریا  صاحب  نے  جانے  کیسی  نفسیات  پڑھی  اور  پڑھائی،  کہ  انہیں  ہمارے  معاشرے  کی  گھناؤنی  رسومات،  دقیانوسی  رواج  اور  جنسی  تعلیم  کا  فقدان  نظر  نہیں  آتا،  منٹو  کے  افسانے  ہی  دکھائی  دیتے  ہیں۔

اوریا  صاحب  نے  پاکستانی  کالم  نگاروں  کی  سنت  پر  عمل  کرتے  ہوئے  ہر  مسئلے  میں  ٹانگ  ضرور  اڑائی  ہوتی  ہے۔  کبھی  انہیں  خفیہ  تنظیمیں  عوام  کی  سوچ  قابو  کرتے  نظر  آتی  ہیں  تو  کبھی  و ہ  تحریک  طالبان  پاکستان  کے  نام  عشقیہ  خطوط  لکھتے  نظر  آتے  ہیں،  کبھی  شام  میں  برپا  خانہ  جنگی  انہیں  قیامت  کی  قربت  کا  نشان  دکھائی  دیتی  ہے  اور  کبھی  ہندو  جوتشیوں  کی  پیش گوئیوں  کی  بنیاد  پر  وہ  پاک بھارت  جنگ  کا  اعلان  کرتے  ہیں۔  اسی  طرح  وہ  انگریزی  زبان  کی  جگہ  طلبہ  کو  عربی  اور  فارسی  پڑھانے  کے  حق  میں  ہیں۔ 

تاریخ  اور  حقائق  میں  گڑبڑ  کرنے  کی  روش  جاوید  چوہدری،  حامد  میر، جنید  سلیم  اور  اس  قماش کے  دیگر  افراد  کا  خاصہ  رہا  ہے  البتہ  اوریا  مقبول  صاحب  اس  فن  کو  نئی  انتہاؤں  تک  لے  جانے  کا  اعزاز  رکھتے  ہیں۔  معاشیات  کے  مضمون  پر  صاحب  کا  خصوصی  کرم  ہے۔  ان  کے  مطابق  دنیا  کے  تمام  سرکاری  بینک  ایک  خفیہ  ادارے  کے  ماتحت  کام  کرتے  ہیں  جہاں  یہ  فیصلہ  کیا  جاتا  ہے  کہ  کس  ملک  کو  غریب  رکھنا  ہے  اور  کسے  امیر  کرنا  ہے۔   انکے  مطابق  کرنسی  نوٹ  اور  اے  ٹی  ایم  مشینیں  اور  بینک  دجالی  نظام  کی  گواہی  دیتے  ہیں  جسے  یاجوج  ماجوج  نے  نافذ  کر  رکھا  ہے۔  ایک  کالم  میں  صرف  اپنی  علمیت  جھاڑنے  کے  لیے
 KIBOR
  کا  ترجمہ  تک  غلط  کر   دیا۔  یہ  بھی  انکشاف  کیا  کہ  دنیا
 نے  معاشی  بحران  سے  نکلنے  کے  لیے  اسلامی  بینکاری  کا  رخ  کرنا  شروع  کر  دیا۔  ایک  جگہ  لکھا  کہ  برطانوی  راج  نے  برصغیر  میں  ترقیاتی  کام  کیا  لیکن  کبھی  قرضہ  نہیں  لیا(اس  قسم  کی  بونگی  میٹرک  کے  طلباء  بھی  نہیں  مارتے)۔  ایک  کالم  میں  نیوٹن  غریب  کو  سونے  کے  سکوں  کی  جگہ  کرنسی  نوٹ  جاری  کروانے  کا  ذمہ  دار  ٹھہرا  دیا  اور  ایک  دن  انکشاف  کیا  کہ  یہود  دراصل  یاجوج  ماجوج  کی  جدید  شکل  ہیں۔ 

  

 پاکستانی  دائیں  بازو  کی  روایت  زندہ  رکھتے  ہوئے  اوریا  صاحب  کسی  بھی  مسئلے  کا 

صر ف  ایک  پہلو(جو  انکے  موقف  سے  مطابقت  رکھتا  ہو)پر  روشنی  ڈالتے  ہیں۔  منٹو  والے  مضمون  میں  انہیں  ’ٹھنڈا  گوشت‘ ،  ’بلاؤز‘   اور  ’کھول  دو‘   تو  نظر  آئے،  ’ٹوبہ  ٹیک  سنگھ‘ ،  ’انکل  سام  کے  نام  خطوط‘  یا  ’نیا  قانون‘   کا  ذکر  کرنا  مناسب  نہیں  سمجھا ،  اسی  طرح  مصر  میں  اخوان  کی  حکومت  کے  خلاف  ’سیکولر‘  اقدامات  پر  طعن و تشنیع  تو  ہوئی  لیکن  اس  عمل  کی  حمایت  کرنے  والی  سلفی  جماعت  اور  مشرق  وسطی  کی  مسلمان  حکومتیں  نظر  نہ  آئیں۔  بنگلہ دیش  میں  غلام  اعظم  کو  ملنے  والی  سز ا  پر  ایک  پورا  کالم  لکھ  مارا  لیکن  البدر  یا  الشمس  کی  جانب  اشارہ  تک  نہیں  کیا  بلکہ  بنگلہ دیش  کی  موجودہ  ترقی  پر  بوگس  اعتراضات  کا  پلندہ  پیش  کیا۔  اس  موضوع  پر  انکے  ایک  کالم  سے  حامد  میر  کے  والد  صاحب  کے  سنہری  الفاظ  ملاحضہ  کریں:

  ’ مشرقی  پاکستان،  بھارت،  مشرقی  پاکستان  کے  ہندوؤں  اور  پاکستان  کے  کمیونسٹ  اور  قوم  پرست  دانشوروں  کی  مسلسل  محنت  سے  ٹوٹا‘۔

  وارث  میر  صاحب  کافی  عرصہ  نوائے  وقت  میں  کالم  لکھتے  رہے  لہذا  انکی  ’نظریاتی  اُپج‘  کافی  واضح  ہے  البتہ  اوریا  مقبول  نے  بھی  ایسے  لغو  الفاظ  لکھتے  وقت  کسی  تاریخی  کتاب  کا  مطالعہ  کرنے  یا  حوالہ  دینا  مناسب  نہیں  سمجھا۔

اوریا  صاحب  نہ  جانے  کس  بوٹی  کا  استعمال  کرتے  ہیں  جو  انہیں  ہر  سمت  سے  سازش  کی  بو  آتی  ہے  اور  وہ  یک طرفہ  حقائق  کی  بنیاد  پر  الم  غلم  کہانیاں  گھڑ  لیتے  ہیں۔  گزشتہ  دنوں  صاحب  بہادر  نے  ملالہ  کو  موضوع  سخن  بنایا  اور  حسب  معمول  اس  پندرہ  سالہ  بچی  کے  خوب  لتے  لیے(اس  کار خیر  میں  انصار  عباسی  اور  طلعت  حسین  نے  بھی  اگلے  روز  مقدور  بھر  حصہ  ڈالا)۔ کچھ  تفشیش  پر  معلوم  ہوا  کہ  اوریا  صاحب  کا  وہ  کالم  جولائی  2013  میں  ایک  برطانوی  اخبار  میں  چھپنے  والے  مضمون  کا  حرف  بہ  حرف  چربہ  ہے۔  یعنی  پاکستانی  افسر  شاہی  کے  علم بردار،  تنقید  میں  بھی  عقل  سے  زیادہ  نقل  سے  کام  لینے  کے  شوقین  ہیں۔

سچ  پوچھیں  تو  ہم  افسر  شاہی  سے  اسی  قسم  کے  نظریات  کی  توقع  کرتے  ہیں۔  اسکی  وجہ  جاننے  کے  لیے  پچھلی  دہائی  میں  مقابلے  کے  امتحانات  کے  کچھ  سوالات  ملاحضہ  کریں:  ’دوسرے  مذاہب  کے  مقابلے  میں  اسلام  کی  بڑائی  اور  شان وشوکت  پر  تفصیلی  مضمون  لکھیں‘ ،  ’اسلام  میں  خلافت  کے  تصور  کو  تفصیل  سے  بیان  کریں‘ ،  ’اسلام  کے  سیاسی  اور  عدالتی  نظام  پر  روشنی  ڈالیں‘۔  ’سانحہ  مشرقی  پاکستان  کے  بنیادی  اسباب  بیان  کریں  اور  اس  واقعہ  کے  پاکستان  کی  تاریخ  پر  کیا  اثرات  مرتب  ہوئے‘ ،  ’برطانوی  اور  ہندووانہ  سازش  کے  نتیجے  میں  پاکستان  کی  تخلیق  قائد  کی  سوچ  کے  مطابق  نہیں  ہو  سکی،  اس  پہلو  پر  روشنی  ڈالیں‘۔     

Thoughts on Indus Waters Treaty (In Urdu)

(Appeared first at Dawn Urdu)

پانی  کا  بلبلہ 

بھارت  ہمارا  پانی  چوری  کر  رہا  ہے‘،  ’بھارت  ہمارے  دریاؤں  پر  ڈیم’
  بنانے  بند  کرے‘،  ’بھارت  سندھ  طاس  معاہدے  کی  خلاف  ورزی  بند  کرے‘،  ’پانی  کا  مسئلہ  قومی  سلامتی  کا  مسئلہ  ہے‘  اور  اس   طرز  کی  دیگر  شہ سرخیاں  میری  طرح  شائد  آپ  کی  نگاہ  سے  بھی  گزری  ہوں۔  یہ  پروپیگنڈہ  اور  شوروغوغا  کرنے  میں  دائیں  بازو  کے  اخبارات(جن  میں  نوائے  وقت  نمایاں  ترین  ہے)  اور  بھارت  مخالف  گروہ  جیسے  جماعت الدعوہ،  برابر  کے  شریک  ہیں۔  ہر  سال  کسی  نہ  کسی  موقع  پر  کوئی  سیمینار  یا  ریلی  اس  موضوع  پر  منعقد  کی  جاتی  ہے  اور  بھارتی  شاطر  رویے  کے  ساتھ  ساتھ  پاکستانی  حکمرانوں  کی  نااہلی  کو  خوب  کوسا  جاتا  ہے۔  گزشتہ  کچھ  سالوں  کے  دوران  دریاؤں  میں  طغیانی  کے  باعث  آنے  والے  سیلاب  کی  ذمہ داری  بھی  بھارت  پر  ڈالی  گئی۔ 

سن  2010  میں  جماعت  الدعوہ  نے  لاہور  میں  مال  روڈ  پر  بھارت  کے  خلاف  ایک  جلوس  نکالا  جس  سے  حافظ  سعید  صاحب  نے  خطاب  کیا۔  جماعت  کے  اخبار  ’الجرار‘  نے  پاکستان  کے  واٹر  کمیشنر  جماعت  علی  شاہ  پر  ملک  سے  غداری  کا  الزام  لگایا  اور  بتایا  کہ  وہ  بھارتی  نقطہ  نگاہ  کو  زیادہ  اہمیت  دیتے  ہیں۔  اسی  سال  نوائے  وقت  اخبار  کے  زیر انتظام  ایک  سیمینار  منعقد  کیا  گیا  جس  کے  مطابق  جماعت  علی  شاہ  کی  وجہ  سے  بھارت  ہمارا  پانی  چوری  کر نے  میں  مگن  ہے۔  اس  سال  کے  آخر  میں  جماعت  علی  شاہ  کو  وزیر  اعظم  کے  حکم  پر  برخواست  کر  دیا  گیا۔  اخبارات  کو  بتایا  گیا  کہ  بھارت  نے  نمو  ڈیم  تعمیر  کیا  لیکن  شاہ  صاحب  نے  اس  اطلاع  کے  باوجود  اس  منصوبے  کو  رکوانے  میں  اپنا  کردار  ادا  نہیں  کیا۔  

سیانے  کہتے  ہیں  کہ  ’ہیں  کواکب  کچھ،  نظر  آتے  ہیں  کچھ‘  اور  یہ  کہ  اس  طرح  کے  مسائل  کے  کئی  پہلو  ہوتے  ہیں  جن  کو  سمجھے  بغیر  بات  نہیں  بنتی۔  نعرے  بازی  اور  شہ سرخیاں  لگانے  کے  لیے  زیادہ  عقل  کی  ضرورت  نہیں  ہوتی  البتہ  مسائل  کی  تہہ  تک  پہنچنے  کے  لیے  بصیرت  ضرور  درکار  ہوتی  ہے۔ 

پاکستان  اور  بھارت  کے  درمیان  پانی  کا  مسئلہ  تاریخی  حیثیت  کا  حامل  ہے۔  تقسیم  کے  ایک  سال  بعد  پانی  کے  معاہدے  کی  میعاد  ختم  ہوئی  تو  بھارتی  پنجاب  کی  جانب  سے  پانی  روک  لیا  گیا۔  اس  بارے  میں  پاکستان  کی  ایک  مشہور  نصابی  کتب  پر  نظر ڈالتے  ہیں (جو  سید  مودودی  کے  اقوال ونظریات  سے  بھرپور  ہے)۔  شیخ  محمد  رفیق  کی  رقم کردہ  کتاب  ’مطالعہ  پاکستان  (لازمی)  برائے  طلبہ  بی  اے، بی  ایڈ،  ایم  بی بی  ایس و  بی  ایس سی  انجینرنگ  و  دیگر  گریجو ایشن  کورسز‘  میں  نہری  پانی  کے  تنازعے  پر  مندرجہ  ذیل  بحث  موجود  ہے۔ 

” برصغیر  کی  تقسیم  سے  جو  معاشی  مسائل  پیدا  ہوئے،  ان  میں  سے  ایک  نہری  پانی  کا  تنازعہ  بھی  تھا  جس  نے  دوسرے  تنازعات  کی  طرح  بھارتی  حکومت  کے  معاندانہ  طرز  عمل  کی  بدولت  جنم  لیا۔  مشرقی  پنجاب  کے  وزیر  اور  افسر  پاکستان  پر  مہلک  ترین  وار  کرنے  کے  منصوبے  بنا  رہے  تھے  اور  31  مارچ  1948  کو  ثالثی  کمیشن  کی  مدت  کار  ختم  ہوتے  ہی  بھارت  نے  ان  تمام  نہروں  کا  پانی  منقطع  کر  دیا  جو  بھارت  سے  پاکستان  داخل  ہوتی  تھیں۔  پاکستان  کے  لیے  بھارت  کا  یہ  رویہ  انتہائی  پریشان کن  تھا۔  اس  مسئلے  کو  حل  کرنے  کے  لیے  ایک  وفد  مئی  کے  آغاز  میں  دہلی  بھیجا  گیا۔  بالاخر  4   مئی  کو  پاکستانی  وفد  نے  ایک  مشترکہ  اعلان  پر  دستخط  کیے  اور  پانی  کی  سپلائی  عارضی  طور  پر  بحال  کی  گئی۔  چوہدری  محمد  علی  کے  تبصرے  کے  مطابق  ’اس  مسئلے  میں  مشرقی  پنجاب  نے  شاطرانہ  چال  چلی  اور  مغربی  پنجاب  نے  اپنے  فرض  سے  غفلت  برتی۔  اس  کے  نتائج  پاکستان  کے  لیے  تباہ کن  ثابت  ہوئے“۔  اسی  کتاب  میں ایک  اور  مقام  پر  سرسری  طور  پر  سندھ  طاس  معاہدے  کا  ذکر  موجود  ہے۔

’سندھ  طاس  معاہدے  کی  رو  سے  پاکستان  نے  تین  مشرقی  دریاؤں (ستلج،  بیاس  اور  راوی)  کو  بھارت  کی  ملکیت  تسلیم  کر  لیا۔  اس  طرح  پاکستان  کے  جو  علاقے  متاثر  ہوئے،  ان  کو  پانی  پہنچانے  کے  لیے  لینک  کینالز  تعمیر  کی  گئیں۔‘    

یہاں  مصنف  اس  بات  کا  ذکر  کرنا  بھول  گئے  کہ  پانی  کی  بندش  کھلوانے  میں  بھارتی  وزیر اعظم  نہرو  نے  بنیادی  کردار  ادا  کیا  اور  یہ  کہ  چوہدری  محمد  علی،  مودودی  صاحب  کے  دوستوں  میں  شمار  ہوتے  تھے،  اسی  لیے  تو  جماعت  اسلامی  نے  1956  کا  آئین  ’عین  اسلامی‘  قرار  دیا  تھا،  اور  یہاں  چوہدری  صاحب  نے  دو  جملوں  کی  بنیاد  پر  ایک  مفروضہ  ہی  کھڑ ا  کر  دیا۔

سندھ  طاس  معاہدہ  آٹھ  سال  کی  محنت  کے  بعد  دونوں  فریقین  نے  1960  میں  منظور  کیا  تھا۔  اس  معاہدے  کو  پانی  کی  تقسیم  کے  حوالے  سے  ایک  لازوال  شہرت  حاصل  ہے  اور  تاریخ  گواہ  ہے  کہ  تین  جنگوں  کے  باوجود  کبھی  اس  معاہدے  کی  خلاف  ورزی  نہیں  کی  گئی۔  رہی  بات  پانی  چوری  اور  ڈیم  بنانے  کی  تو  دائیں  بازو  کے  دانشوروں  سے  گزارش  ہے  کہ  کبھی  ورلڈ  بینک  کی  ویب  سائٹ  کھولیں  اور  سندھ  طاس  معاہدے  کے  ضمیمے  C,D  اور  E
  کا  بغور  مطالعہ  کریں۔  (قارئین   یہ

  ضممیے  اس  لنک  سے  حاصل  کر  سکتے  ہیں)۔  ان  میں  سے  پہلا  ضمیمہ  بھارت  کو  مغربی  دریاؤں  سے  کاشت کاری  کے  لیے  پانی  استعمال  کرنے  کی  اجازت  پر  مبنی  ہے،  دوسرا  بھارت  کو  مغربی  دریاؤں  پر  بجلی  بنانے  کی  اجازت  پر  مبنی  ہے  اور  تیسرا  ضمیمہ  مغربی  دریاؤں  سے  پانی  ذخیرہ  کرنے  کی اجازت  پر  مشتمل  ہے۔ 

جہاں  تک  پانی  چوری  اور  نمو  ڈیم  کا  تعلق  ہے،  پاکستان  کے  وزیر  خارجہ  شاہ  محمود  قریشی  نے  اپریل  2010  میں  ایک  اخباری  کانفرنس  سے  خطاب  کے  دوران  بتایا  کہ  ’بھارت  ہمارا  پانی  چوری  نہیں  کر  رہا۔  برائے  مہربانی  اس  غلط  فہمی  میں  مت  پڑیں  اور  قوم  کو  بھی  اس  معاملے  میں  گمراہ  نہ  کریں۔  در  حقیقت  ہم  خود  اپنا  پانی  ضائع  کر  رہے  ہیں‘۔ 

ہمارے  بہت  سے  ’سورما‘  لکھاری،  جو  روز  اپنے  کالموں  کے  ذریعے  تاریخ  کا  جنازہ  نکالتے  رہتے  ہیں،  یہ  پیش  گوئی  کرتے  ہیں  کہ  ’آئندہ  تمام  جنگیں  پانی  کے  مسئلے  پر  ہوں  گی‘۔  اس  پہلو  پر  بہت  سا  تحقیقی  مواد  موجود  ہے  اور  شواہد  کے  مطابق  ایسا  کوئی  امکان  موجود  نہیں  ہے۔  بر اعظم  شمالی  امریکہ  سے  لے  کر  مشرقی  ایشیا  تک  درجنوں  ممالک  ایک  دوسرے  کے  ساتھ  پانی  کے  معاملے  میں  تعاون  کر  رہے  ہیں  اور  فی الحال  پانی  کی  وجہ  سے  کوئی  بھی   جنگ  ہونے   کا  امکان  نہیں  ہے۔    

سرفروشی کی تمنا اب ہمارے دل میں ہے

ہمیں  آزادی  نہیں  چاہیے،  ہمیں  ایسی  آزادی  نہیں  چاہیے  جس  میں  انگریز  حکمرانوں  کی  جگہ  مقامی  اشرافیہ  لے
  لیں۔  ہمیں  ایسی  آزادی  نہیں  چاہیے  جس  میں  استحصال  اور  غلامی  کا  یہ  ذلت  آمیز  نظام  قائم  رہے۔  ہم  ایسی  آزادی  کے  لیے  جدوجہد  کر  رہے  ہیں  جو  سارے  نظام  کو  انقلابی  تبدیلی  کے  ذریعے  بدل  کر  رکھ  دے‘۔
یہ  زریں  الفاظ  مارچ  1940میں  منعقد ہ  مسلم  لیگ  کے  سالانہ  اجلاس  کے  کسی  مقرر  کے  نہیں،  نہ  ہی  ان  الفاظ  کو  مارچ  2013 کے  ’سونامے‘  میں  شامل  کسی  راہنما  نے  ادا  کیا۔  ان  الفاظ  کو  ادا  کرنے  والا  شخص،  برصغیر  کی  آزادی  میں  نمایاں  کردار  ادا  کرنے  والا  ایک  سپاہی  تھا،  جس  نے  اپنے  مقصد  کی  تکمیل  کے  لیے  اپنی  جان  نچھاور  کر  دی۔  افسوس  کی  بات  تو  یہ  ہے  کہ  جس  وقت  مینار  پاکستان  کے  سائے  تلے  تبدیلی  کے  علم  بردار  فن  تقریر  کے  جوہر  دکھا  رہے  تھے،  عین  اسی  وقت  لاہور  کے  ایک  دوسرے  حصے  میں  چند  افراد  ’سرفروشی  کی  تمنا‘  رکھنے  والوں  کی  یاد  تازہ  کر  رہے  تھے  اور  ان  کو  نہ  صرف  گالیوں  سے  نوازا  گیا  بلکہ  ہاتھا  پائی  کی  بھی  بھرپور  کوشش  کی  گئی۔

ہ  طوفان  بد  تمیزی  برپا  کرنے  والے،  ’اسلامی  تشخص‘  کے  ان  ٹھیکے  داروں  نے  بینر  اٹھا  رکھے  تھے  جن  میں  سے  ایک  کے  مطابق  ’شادمان  فوارہ  چوک  کو  بھگت  سنگھ  کے  نام  سے  منسوب  کرنے  کی  جسارت  پر  ہم  بھر پور  احتجاج  کرتے  ہیں‘۔  جمہوریت  کا  تقاضا  تو  یہ  ہے  کہ  پرامن  احتجاج  کی  آزادی  شہریوں  کو  حاصل  ہے،  لیکن  مخالفین  پر  تشدد  کی  اجازت  کوئی  قانون  نہیں  دیتا۔  اسی  روز  اخبار  میں  خبر 
چھپی  کہ  ’بھگت  سنگھ  کے  چاہنے  والے  فوارہ  چوک  کا  رخ  نہ  کریں،  ہم  کسی  صورت  بھگت  سنگھ  کو  اہل  اسلام  اور  اہل  پاکستان  کا  ہیرو  بننے  کی  اجازت  نہیں  دیں  گے۔منجانب  بھگت  سنگھ  نامنظور  ایکشن  کمیٹی‘

 ان  جاہلوں  نے  کبھی  تاریخ  کا  سرسری  سا  مطالعہ  بھی  کیا  ہوتا  تو  انہیں  چند  بنیادی  حقائق  کا  اندازہ  ہو  جاتا۔پہلی  عرض  تو  یہ  کہ  ہیرو  بننے  کے  لیے   کسی  بھی  انسان  کو  شادمان  کی  تاجر  برادری  کا  سرٹیفیکٹ  نہیں  چاہیے  بلکہ  تاریخ  خود  اس  چیز  کا  تعین  کرتی  ہے۔ دوسری  بات  یہ  کہ  بھگت  سنگھ  نے  کبھی  کسی  مذہب  کی  حمایت  کا  دعوی  نہیں  کیا  بلکہ  وہ  تو  مذہب  کی  بنیاد  پر  تفریق  کا  سخت  مخالف  تھا۔ 

بھگت  سنگھ  نے  برصغیر  کی  آزادی  کے  لیے  جدوجہد  کی،  کسی  مخصوص  فرقے  یا  مذہب  کی  آزادی  کے  لیے  نہیں۔  اگر  بھگت  سنگھ  شادمان  کے  شاہینوں  کی  طرح  تنگ  نظر  ہوتا  تو  کبھی  ایک  ہندو  راہنما  لالہ  لاجپت  رائے  کے  قتل  کا  انتقام  نہ  لیتا،  نہ  ہی  گاندھی  کی  مخالفت  کرتا۔  اور  یاد  رہے  کہ  یہ  لالہ  لاجپت  رائے  وہ  صاحب  ہیں  جن  کا  ایک  خط  جناح  صاحب  نے  23مارچ1940کی  اپنی  تقریر  میں  پڑھا۔  اس  خط  میں  لالہ  جی  نے  لکھا  تھا  کہ میں  مسلمانوں  کی  تاریخ  اور  فقہ  پڑھ  کر  اس  نتیجہ  پر  پہنچا  ہوں  کہ  ہندو  اور  مسلمان  اکٹھے  نہیں  رہ  سکتے  اور  ہمیں  اب  کوئی  راہ  نجات  نکالنی  چاہیے۔ 

یہ  ہمارا  قومی  المیہ  ہے  کہ  ہماری  نصابی  کتابوں  سے  محض  سطحی  اختلافات  کی  بنا  پر  بر صغیر  کی  تاریخ  کے  اہم  کرداروں  جیسے  بھگت  سنگھ،  لالہ  لاجپت  رائے  اور  سبھاش  چندرا  بوس  کو  حذف  کیا  گیا۔  ابن  خلدون  نے  کہا  تھا  کہ  تاریخ  کا  کوئی  مذہب  یا  عقیدہ  نہیں  ہوا  کرتا،  لیکن  اس  بات  کا  خیال  ہمارے  اربا ب  بست و کشاد  کو  کبھی  نہیں  آیا۔

تاریخ  کا  جنازہ  صرف  شادمان  چوک  تک  ہی  محدود  نہیں  رہا  بلکہ  مینار  پاکستان  کے  سائے  تلے  بھی  تاریخ  کی  آرتی  جلائی  گئی۔  کے  کے  عزیز  صاحب  نے  اپنی  کتاب  میں  لکھا  کہ  ہمیں  قرارداد  لاہور  سے  متعلق  تاریخ  غلط  پڑھائی  جاتی  ہے  کیونکہ  آل  انڈیا  مسلم  لیگ  کا  سالانہ  اجلاس  24مارچ  تک  جاری  رہا  اور  طریق  یہ  ہے  کہ  کوئی  بھی  قرارداد  اجلاس  کے  آخری  روز  پیش  کی  جاتی  ہے۔  23مارچ1940 کو  جناح  صاحب  نے  تقریر  تو  ضرور  کی  لیکن  قرارداد  لاہور   24مارچ  کو  پیش  کی  گئی۔  سونامی  پارٹی  نے  اپنے  ’تاریخ  ساز‘  جلسے  کے  میدان  کو  پانی  پت  سے  تشبیح  دی  تھی۔  تاریخ  کے  طالب  علم  واقف  ہیں  کہ  پانی  پت  کے  میدان  میں  تین  بڑی  جنگیں  لڑی  گئیں۔  سب  سے  پہلے  وسطی  ایشیا  سے  تعلق  رکھنے  والے  تیموری النسل بادشاہ  بابر  نے  1526میں  ابراہیم  لودھی  سے  جنگ  کی۔  پانی  پت  کے  مقام  پر  دوسری  بڑی  جنگ  1556میں  بابر  کے  پوتے،  شہنشاہ  اکبر  نے  راجا  ہیمو  کے  خلاف  لڑی۔  اس  مقام  پر  تیسری  بڑی  جنگ  افغان  بادشاہ  احمد  شاہ  ابدالی  نے  مرہٹہ  سرداروں  کے  خلاف  لڑی۔  

ہمیں  کوشش  کے  باوجود   اس  دن  کسی  اخبار  یا  نشریاتی  ادارے  کی  خبروں  میں  جلسے کے  دوران کسی  طرز  کی  لڑائی  کا  تذکرہ  نہیں  ملا۔  چند  خواتین  نے  البتہ  یہ  شکایت  ضرور  کی  کہ  بارش  کے  باعث  بھگدڑ  مچنے  کا  چند  من  چلوں  نے  ناجائز  فائدہ  اٹھایا  اور  اس  طرز  کے  ’معرکوں‘  کو  پانی  پت  سے  مشابہت  دینا  ناانصافی  ہو  گی۔  البتہ  خان  صاحب  کو  بابر  سے  ضرور  تشبیح  دی  جا  سکتی  ہے  کیونکہ  بابر  کا  بہت  مشہور  قول  ہے 

’بابر  بہ  عیش  کوش،  عالم  دوبار  نیست‘  اور  خان  صاحب  نے  اپنی  کافی  ساری  عمر  اس  قول  کے  عملی  نمونے  کے  طور  پر  گزاری۔

اگر  سونامی  پارٹی  والوں  کی  مراد  پانی  پت  کی  آخری  جنگ  تھی  تو  ان  کو  یہ  بات  باور  کرانے  کی  ضرورت  ہے  کہ  احمد  شاہ  ابدالی  نے  صرف  مرہٹوں  کو  شکست  نہیں  دی  تھی  بلکہ  دہلی  کی  بھی  اینٹ  سے  اینٹ  بجا  دی  تھی،  یعنی  وہاں  بھی  ایک  طرح  کا  سونامی  آ  گیا  تھا۔  اس  سونامی  کے  نتیجے  میں  دہلی  کا  کیا  حشر  ہوا،  اس  کی  تفصیلات  پھر  کبھی  سہی۔  خان  صاحب  اور  انکا  ٹولہ  کس   کے  ایما  پر  کس  کی  اینٹ  سے  اینٹ  بجانا  چاہتے  ہیں،  علما ء  اس  معاملے  پر  ابھی  تک  خاموش  ہیں۔

ابھی  یار  لوگ  جلسے  کے  حاضرین  کی  تعداد  پر  ہی  بحث  کر  رہے  تھے  کہ  خبر  آئی  کہ  سونامی  پارٹی  نے  جماعت  اسلامی  کے  ساتھ  انتخابی  الحاق  کا  اعلان  کیا  ہے،  گویا  کہ  پہنچی  وہیں  پہ  خاک  جہاں  کا  خمیر  تھی۔  اس  عمل  سے  صاف  ظاہر  ہو  گیا  کہ  شادمان  کے  تاجروں  اور  سونامی  کے  دعوے  داروں  کی  سوچ  میں  کوئی  خاص  فرق  نہیں  اور  جیالے  لاکھ  نعرے  لگا  لیں،  لیکن  بھٹو  مر  چکا  ہے  اور  مودودی  ابھی  تک  زندہ  ہے۔

یہ وہ سحر تو نہیں

1947 کی بات ہے۔ پاکستان معرض وجود میں آ چکا تھا۔ فیض صاحب دہلی سے لاہور منتقل ہوئے تو نئے ملک کی حالت دیکھ کر دم بخود رہ گئے اور اپنے جذبات کو کچھ یوں بیان کیا:

یہ داغ داغ اجالا، یہ شب گزیدہ سحر
تھا انتظار جس کا، یہ وہ سحر تو نہیں

اجالا بیشک داغ داغ تھا لیکن تقسیم کے بعد شہر لاہور کی ادبی محفلوں کو چار چاند لگ گئے اور اس وقت جو ادب تخلیق کیا گیا، اس جیسا آج تک نہیں کیا جا سکا۔

وقت تبدیل ہوا۔ ابتدائی دنوں کا خمار ٹوٹا اور لاہور کی ادبی سرگرمیوں میں کمی آئی کیونکہ روزگار کے غم دلفریب ہونا شروع ہو گئے۔

وقت گزرتا گیا اور ادبی محفلیں کثیر تر ہوتی گئیں۔ طواف کو نکلے چاہنے والے، نظریں جھکا کر اور جسم و جاں بچا کے چلنے لگے۔ لبوں سے آزادی چھین لی گئی اور ’بول‘ کی صدا لگانے والے ملک بدر کر دیے گئے۔ پاک ٹی ہاؤس ٹائروں کی دکان میں تبدیل ہو گیا، کافی ہاؤس بند ہوتے گئے۔

اس جمود کے عالم میں لاہور ادبی میلے کا انعقاد ایک خوش آئند قدم تھا، اور امید ہے کہ اس طرز پر ہر برس کم از کم ایک تقریب ضرور منعقد کی جائے گی۔

تقریب کا آغاز معروف صحافی مظہر علی خان کے صاحب زادے طارق علی کی تقریر سے ہوا۔ موصوف نے دنیا بھر کے انقلابیوں کا ذکر کیا لیکن ادب سے متعلق کوئی بات کرنے سے گریز اختیار کیا۔

اسی دن کے ایک اور سیشن میں جناب نے سونامی پارٹی کی حمایت کا اعلان کیا جس پر وہاں کثیر تعداد میں موجود برگر بچوں نے خوشی کا اظہار کیا۔ ساری عمر بائیں بازو کی سیاست کا نعرہ بلند کرنے والوں کو سونامی پارٹی میں کیا خاص بات نظر آئی، علماء اس معاملے میں ابھی تک خاموش ہیں۔

ایک دانشور عزیزالحق صاحب نے ایسے لوگوں کے بارے میں کہا تھا کہ ’رہے ساری عمر یوپی کے نواب کے نواب اور سکھاتے رہے اہل پنجاب کو مزدور تحریک کے اسرار و رمو ز‘

تقریب میں ہمارا پسندیدہ سیشن پاکستانی فلموں کے بدلتے کردار سے متعلق تھا۔ ہم نے دیکھا کہ وقت ڈھلنے کے ساتھ کس طرح پاکستانی فلم سازوں، ہدایت کاروں اور لکھاریوں کی ترجیحات بدلتی رہیں، حتی کہ ایک وقت ایسا بھی آیا جب چنگیز خان کو مسلمان دکھایا گیا اور وہ ’اللہ کی رحمت کا سایہ‘ کہلایا۔

لاہور ادبی میلے سے ہمارا سب سے بڑا گلہ یہ رہا کہ تمام اہتمام ایک مخصوص طبقے کے لیے رہا، حتی کہ لاہور کے مہنگے ترین تعلیمی اداروں (جن میں سے ایک کا افتتاح برطانوی واسرائے نے کیا اور دوسرے کو برطانیہ کے گرامر سکولوں کی طرز پر قائم کیا گیا) کے طلباء پر ادبی میلے میں حاضری لازم قرار دی گئی۔

ان بچوں کی موجودگی کے باعث چند مضحکہ خیز واقعات بھی رونما ہوئے۔ ایک سیشن میں انتظار حسین صاحب نے جب دو چار منٹ اردو میں بات شروع کی تو ہال خالی ہونا شروع ہو گیا، اور یہ لازوال فقرہ سننے کو ملا :’چلو بھئی یہاں تو اب شعروشاعری شروع ہو گئی ہے‘۔ لاہور جیسے شہر میں اردو کا اس طرح جنازہ نکلتے، نہ پہلے دیکھا، نہ سنا۔

ایک موقع پر منٹو صاحب پر ہونے والے سیشن میں ان کی بھتیجی ڈاکٹر عائشہ جلال سے اصرار کیا گیا کہ گفتگو انگریزی میں کریں۔ مانا کہ بہت سے غیر ملکی مہمان بھی وہاں موجود تھے لیکن لاہور میں منعقد میلے میں منٹو پر بات اگر اردو میں نہ کی جا سکے تو یہ شرم کا مقام ہے۔

خورشید کمال عزیز صاحب، جو کے کے عزیز کے نام سے بھی جانے جاتے ہیں، اپنی کتاب ’تاریخ کا قتل‘ میں لکھ گئے کہ پنجاب کے لوگوں نے کبھی اپنی زبان کی قدر نہیں کی، پہلے اردو کی ترویج و ترقی کا بیڑہ اٹھایا تو کبھی انگریزی کی جانب راغب ہوئے، جبکہ حقیقت تو یہ ہے کہ نہ ہی اردو ہماری زبان ہے نہ ہی انگریزی۔ یہ دونوں زبانیں تو نوآبادیاتی زبانیں ہیں اور ہماری زبان تو دراصل پنجابی ہے۔

لاہور پنجاب کا دارلحکومت ہے اور یہاں منعقدہ ادبی میلے میں پنجابی پر کچھ نہ کچھ بات ضرور ہونی چاہیے تھی، لیکن جس طرز کا طبقہ بلایا گیا تھا ان کے ہاں پنجابی صرف انکے ڈرائیور حضرات ہی بولتے اور سمجھتے ہیں۔ وارث شاہ، بلھے شاہ، بابا فرید، منیر نیازی، استاد دامن اور امرتا پریتم کی ارواح کو اس طرح کی زیادتی پر بہت تکلیف پہنچی ہوگی۔

اردو پر دو عدد سیشن ہوئے جن میں سامعین تو ایک طرف، چند مقررین نے ہی تشریف لانا گوارا نہیں کیا۔ منٹو اور فیض کا تذکرہ تو بہت ہوا لیکن یار لوگ تو اب صاف کہتے ہیں کہ فیض اور منٹو ادب اور جدوجہد سے زیادہ فیشن کی علامات بن چکے ہیں، یا بنا دیے گئے ہیں۔

ہمیں انگریزی لکھنے والوں سے کوئی پرخاش نہیں مگر جس ملک میں ایک آبادی کی ایک بڑی تعداد آپ کی لکھائی نہ پڑھ سکے، وہاں آپ انگریز ی کی بجائے ولندیزی زبان بھی لکھ لیں تو کچھ مضائقہ نہیں۔ ہاں اگر آپ نے باہر کی دنیا کے لیے لکھنا ہے تو بصد شوق لکھیے، خیالات کسی ایک زبان کی میراث نہیں ہوتے۔

ادبی میلے کے خو ش آئند پہلووں میں بچوں اور نوجوان لکھاریوں کے لیے کیے گئے سیشن شامل تھے۔ اسی طرح ادب میں طوائف کے کردار پر ایک عمدہ سیشن ہوا۔ ادب اور خواتین پر بھی ایک سیشن رکھا گیا جس میں پاکستان میں سب سے زیادہ پڑھی جانے والی خواتین مثلاََ عمیرہ احمد کو مدعو ہی نہیں کیا گیا۔ میلے میں شریک ایک صاحب کے مطابق، جو ایک ہسپتال کی ڈسپنسری میں کام کرتے ہیں، میلے کا ماحول اور اس کے شرکا ء کسی دوسرے سیارے کے مکین لگ رہے تھے۔

کے کے عزیز نے پنجابیوں کی ایک اور صفت بھی بیان کی تھی، یعنی ’سارے جہاں کا درد ہمارے جگر میں ہے‘ لیکن اپنے علاقے اور اس کے لوگوں کی ہمیں کوئی خاص پرواہ نہیں۔

قابل عزت صحافی اور قلم کار محمد حنیف صاحب نے گم شدہ بلوچوں کا نوحہ پڑھا جو قابل داد ہے لیکن ان ہزاروں ’پنجابیوں‘ کا ذکر تک نہیں کیا جن کا واحد جرم صرف یہ تھا کہ وہ پنجابی ہونے کے باوجود بلوچستان میں رہائش پذیر تھے، ان ہزاروں معصوموں کا نوحہ کون لکھے گا؟

بہرحال حنیف صاحب نے کم از کم فوج کے پنجابی ہونے کی غلط فہمی اپنی آزاد نظم کے ذریعے ضرور دور کی اور کہا کہ ’نواب نو روز خان کو جس کتاب پر ہاتھ رکھ کر جھوٹا وعدہ کیا گیا، وہ کتاب پنجابی زبان میں نہیں تھی، اس کے بیٹوں کو جس پھانسی کی رسی سے لٹکایا گیا وہ رسی اچھرہ سے نہیں بھیجی گئی تھی، وہ راکٹ جو اکبر بگٹی کو لگا کوئی سیالکوٹ سے تیار ہو کر نہیں گیا تھا۔ فوج نہ سندھی ہے، نہ بلوچی، نہ پٹھان، نہ پنجابی، فوج تو بس فوج ہوتی ہے‘

ان تمام تلخ حقیقتوں کے باوجود ہم اپنی کشت ویراں سے ناامید نہیں اور توقع کرتے ہیں کہ آئندہ سالوں میں ادبی میلوں کے انعقاد میں بہتری دیکھنے کو ملے گی اور اجالا مزید داغ داغ نہیں رہے گا۔

ثنا خوان تقدیس مشرق کہاں ہیں؟

چند روز قبل ایک سعودی باشندے فیہان الغامدی نے اپنی پانچ سالہ بیٹی کے ساتھ جو سلوک کیا، وہ نہ صرف ناقابلِ بیان بلکہ ناقابلِ فراموش بھی ہے۔ اسلام اور شریعت کے نام لیواؤں نے البتہ عدل کی مثال قائم کرنے کے بجائے بیٹیاں زمین میں گاڑنے والے معاشرے کی یاد تازہ کردی اور موصوف کو ایک کثیر سی قید اور چند سکے ادا کرنے کی سزا سنائی گئی۔ ابنِ تیمیہ کی تعلیمات پر قائم ریاست سے ہمیں یہی توقع تھی۔

اس واقع سے یہ بات تو واضح ہوگئی کہ سعودی عرب میں چوری کرنے پر تو آپ کے ہاتھ کاٹ دیے جائیں گے، نشہ آور چیزوں کی درآمد پر آپ کا سر قلم کیا جائے گا، لیکن اپنی بیٹی یا کسی سری لنکن آیا کو جان سے مار کر آپ سرخرو ہوسکتے ہیں۔
انسان چاند تک پہنچ گیا لیکن سعودی عرب میں آج تک عورتیں قانونی طور پر گاڑی نہیں چلا سکتیں، کیونکہ سعودی ابھی تک تیرھویں صدی میں رہ رہے ہیں۔

حال ہی میں سعودی حکومت نے حاتم طائی کی قبر پر لات مارتے ہوئے خواتین کو فارمیسی کی دکانوں پر کام کرنے کی اجازت دی ہے۔ یہ خبر پڑھنے کے بعد سے ہم حیرت میں مبتلا ہیں کہ آخر ابھی تک سعودیوں نے حاتم طائی کی قبر منہدم کیوں نہیں کی؟ ابنِ تیمیہ کی روح تڑپ رہی ہوگی۔

تمام عالم میں مسلم اُمّہ کے نام کی ڈگڈگی بجانے والے، اپنے ملک کی شہریت تک تو دینا گوارا نہیں کرتے بلکہ اُمّہ کے دیگر ٹھیکے داروں کے لیے ڈرون طیارے بھی ان کی سرزمین سے اُڑائے جاتے رہے ہیں۔ ایمان سے بتائیے، اگر یہ کھلا تضاد نہیں تو کیا ہے؟ خواتین کی ڈرائیونگ سے تو یقینا ایمان خطرے میں ہے لیکن شام، بحرین، یمن اور پاکستان میں دہشت گردی کی کھلم کھلا ترویج کس شرعی حکم کے مطابق ہے؟

ملک اسحاق اور حافظ سعید کو سالانہ بنیادوں پر ملنے والا ’چندہ‘ جن نیک کاموں میں استعمال ہو رہا ہے، اس کے متعلق سوال کیوں نہیں اُٹھایا جاتا؟ ہندوستان اور جنوب ایشائی ممالک سے جو لڑکیاں غیر قانونی طور پر سعودی عرب لائی جاتی ہیں، اُن کی عصمت اور غیرت کا خیال ثنا خوانِ تقدیسِ مشرق کو کیوں نہیں آتا؟
ہمارے معاشرے میں سعودی عرب کو کچھ زیادہ ہی عزت سے نوازا جاتا ہے۔ اس عزت افزائی کی ایک وجہ تو وہاں پر ہمارے مقدس مقامات کی موجودگی ہے، اس کی ایک وجہ ہمارے وہ عزیز اقربا بھی ہیں جو 80 کی دہائی سے وہاں دن رات کی محنت کے بعد ریال (اور چند کرم فرماؤں کے مطابق شدت پسندی کے جراثیم) اپنے گھر والوں کو ارسال کر رہے ہیں۔

اس عزت اور عقیدت کے مارے ہم عقل اور استدلال کا دامن ہاتھ سے چھوڑ دیتے ہیں۔ تاریخ کا مطالعہ کریں تو معلوم ہوتا ہے کہ موجودہ حکمران خاندان کی حکمرانی 1925 سے پہلے محض نجد کے علاقے تک محیط تھی اور پچھلے چودہ سو سال میں کبھی بھی انہوں نے مقامات مقدسہ پر راج نہیں کیا۔ خلافت عثمانیہ کی بندر بانٹ کے بعد انگریزوں کی حمایت اور امداد کے بل بوتے پر جزیرہ نما عرب پہ قبضہ کرنے والے آج خود کو ’خادمین حرمین شریفین‘ کہتے ہیں۔

بات چل ہی نکلی ہے تو لگے ہاتھوں اِبن تیمیہ صاحب کی کہانی بھی سُن لیجیے۔ تُرکی کے ایک گاؤں حران سے تعلق رکھنے والے تقی الدین ابن تیمیہ نے سلف یعنی ابتدائی دور کے مسلمانوں کے اعمال کو شریعت سمجھنے کے لیے ایک معیار قرار دیا۔

قادریہ سلسلے سے تعلق رکھنے والے ابن تیمیہ نہ صرف اہلِ تشیع کے سخت مخالف تھے بلکہ مزاروں کی زیارت کرنے کو بھی شرک سمجھتے تھے۔ انہوں نے پہلی دفعہ قانونی طور پر فوجی عدالتوں کو گواہی کے بغیر یک طرفہ طور پر سزا ئیں سنانے کا اختیار دیا۔

علاوہ ازیں، حالت جنگ میں دوسرے مسلمانوں کو قتل کرنے کی اجازت بھی جناب نے عطا کی (ان فتاویٰ کو موجودہ دور کے تکفیری آج تک استعمال کر رہے ہیں)۔ ابو غریب اور گوانتامو پر اعتراض کرنے والے نہیں جانتے کہ قید کے دوران تشدد کے حق میں قانونی توجیح تاریخ میں پہلی دفعہ ابن تیمیہ کے خاص شاگرد ابن قائم نے پیش کی۔ سن 1326 میں ابن تیمیہ کو مزار پرستی کے خلاف آواز بلند کرنے پر قید میں ڈال دیا گیا اور دو سال بعد قید کے دوران ہی انکا انتقال ہوا۔ وفات کے بعد دمشق میں واقع ان کے مزار پر کئی صدیوں تک زائرین کا تانتا بندھا رہا۔

ہماری سعودی عرب یا اس کے حکمرانوں سے کوئی ذاتی پرخاش نہیں، مجھ عاجز کی تو آپ سے محض یہ التجا ہے کہ براہ کرم اپنے گریبان پر نظر ڈالیں اور عقیدت کے بھنور سے باہر نکل کر حالات و واقعات پر نظر دوڑائیں۔

انصاف کا تقاضا یہ ہے کہ جس طرح عافیہ صدیقی کی سزا پر واویلا مچایا گیا ویسے ہی اس پانچ سالہ معصوم بچی پر کئے گئے ظلم کے خلاف آواز اٹھائی جائے۔

گورکھ دھندا

ولی رضا نصر امریکہ میں ایران اور مشرقِ وسطی سے متعلق بین الاقوامی امور کے استاد ہیں۔ ان کی دو ہزار نو میں تحریر شدہ کتاب ’اسلامی سرمایہ داری کا عروج‘ میں ولی نصر صاحب کا موقف تھا کہ مسلمان ممالک میں کاروباری طبقے کے پاس پہلے کی نسبت زیادہ سیاسی طاقت موجود ہے اور اس طاقت کو استعمال کر کے انتہا پسندی کے عفریت کو شکست دی جا سکتی ہے۔

اس موقف کو واضح کرنے کے لیے انہوں نے دبئی، ملایشیا، ترکی، ایران اور ابوظہبی کی مثالیں پیش کی ہیں۔ ظاہراَ تو یہ بات معنی طلب لگتی ہے لیکن اس نظریے میں کئی سقم پائے جاتے ہیں۔ عموماَ کسی بھی ملک کا کاروباری طبقہ ملکی حالات میں امن اور تواتر چاہتا ہے کیونکہ امن کے بغیر تجارت ممکن نہیں ہوتی۔

پاکستان کے معاملے میں البتہ گنگا ذرا اُلٹی بہتی ہے، چنانچہ شدت پسندی اور انتہا پسندی کو فروغ دینے میں تاجر برادری کا بھرپور حصہ ہے۔ نوے کی دہائی میں کشمیر ی ’مجاہدین‘ کے لیے چندہ اکٹھا کرنا ہو یا ناموس رسالت کے نام پر ملک گیر ہڑتال کرنی ہو، پاکستان کی تاجر برادری ہمیشہ صفِ اوّل میں رہی ہے۔ یہاں اس امر کی وضاحت ضروری ہے کہ تاجر طبقے سے ہماری مراد درمیانی سطح کے کاروباری حضرات ہیں، بڑے بڑے کارخانوں کے مالکان اور کریانہ فروش نہیں.

ہمیں اپنی تاجر برادری کے کچھ بنیادی تضادات کو سمجھنے میں اکثر دشواری پیش آتی ہے۔ چور بازاری، ذخیرہ اندوزی اور ملاوٹ میں تو کوئی کسر نہیں چھوڑی جاتی لیکن نماز کا وقفہ بہرحال لازم ہے۔ اپنے ملازمین کی تنخواہ بڑھانے کے خیال سے ہی ہول اْٹھتا ہے لیکن مساجد کے لیے چندہ دینے میں کبھی بْخل سے کام نہیں لیا۔ حکومت کو ٹیکس دینا گناہِ کبیرہ سمجھا جاتا ہے مگر ’مجاہدین‘ کے لیے جان بھی حاضر ہے۔

کتاب ’پنجابی طالبان‘ کے لکھاری مجاہد حسین کے مطابق سن دو ہزار دو میں لشکرِ طیبہ کو روزانہ لگ بھگ دو کروڑ چندہ مل رہا تھا۔ یہ چندہ میرے اور آپ کی ریز گاری سے نہیں بلکہ تاجر برادری کی فضیلت سے اکٹھا ہو رہا تھا۔ یاد رہے کہ یہ وہی تاجر طبقہ ہے جس نے چند سال قبل ویلیو ایڈڈ ٹیکس VAT کے نفاذ کے خلاف کہرام برپا کردیا تھا۔ امریکی جھنڈوں کو ہفتہ وار آگ لگانے والے بیوپاری نیٹو کے ٹرکوں سے لُوٹا ہوا مال برسرِعام فروخت کرتے ہیں۔

چند احباب کے خیال میں پنجاب کے تاجر باقی صوبوں کے کاروباری حضرات سے زیادہ بنیاد پرست ہیں۔ پنجاب کا تاجر پنجابی شاؤنزم یعنی بالادستی کا علم بردار ضرور ہے مگر یہ تصور کرنا محض خام خیالی ہے کہ کراچی اور پشاور کے تاجر کوئی دودھ میں دھلے ہوئے ہیں، وہ بھی اِسی گھِن چکر کا حصہ ہیں۔

دلچسپ بات یہ ہے کہ پاکستان کا تاجر طبقہ انتہا پسندی کی پشت پناہی میں منفرد نہیں اور ایسی مثالیں ہمیں ہمسایہ ممالک میں بھی دیکھنے کو ملتی ہیں۔ ہندوستان میں ہندو مہا سبھائی تنظیموں کو ہمیشہ ’بازار‘ کی پشت پناہی حاصل رہی ہے۔ ایران میں انقلاب کے بعد مذہبی راہنماؤں کے عروج اور بائیں بازو کی جماعتوں کے زوال میں کاروباری طبقے کی مرضی شامل تھی۔

تاریخ دان جناب حسن جعفر زیدی کے مطابق انگریز کے دور میں وسطی اور بالائی پنجاب میں منڈیوں کے ارد گرد شہر بسائے گئے اور ان شہروں کے تاجر طبقے نے پاکستان بننے کے بعد کے بگاڑ میں نمایاں کردار ادا کیا۔ لاہور سے شائع ہونے والا ایک اخبار، جس نے نہ صرف پاکستان کو نظریاتی ریاست بنانے کا ٹھیکہ اٹھایا بلکہ غیر جمہوری اقدام کو پروان چڑھانے میں بھی مہارت حاصل کی، ہمیشہ سے کاروباری طبقے کے مفادات کا ترجمان اور محافظ رہا ہے۔

خدا لگتی تو یہ ہے کہ بنیاد پرستی پاکستان کے بالائی یا زیریں طبقے کا مسئلہ نہیں بلکہ ہمارے نو دولتی طبقے کا پھیلایا ہوا ناسُور ہے۔ اس مسئلے کو حل کرنے کے لیے ہمیں پہلے اس گورکھ دھندے کو سمجھنا ہو گا اور تب ہی ہم کسی قسم کے حل تک پہنچ سکتے ہیں۔